Mika's Blog

Ойрд ч блогоо эргэж тойрох нь битгий хэл мартах шахаж. 10 хоногийн өмнө хүүтэй болсоон. Ээж болно гэдэг ч цаанаа л нэг сайхан юм. Өөрт төрж байгаа мэдрэмж бол моруужин идхээс хамаагүй гоё. Хүүгээ хараад хэвтчүүл цаг хугацаа хэрхэн хурдан өнгөрч байгааг ч анзаарах сөхөөгүй болтлоо орон гаран болдог бололтой.
Ямар ч байсан найзууддаа хөөрхөн пандатай болсон гэдгээ дуулгачий гээд ороод ирсэн юм. Шинэ жилээр л жирэмсэн гүйгээд байсан хүн төрж үү үгүй юү?, сураг алдарлаа гээд гайхаж байгаа биз. Энэ завшааныг ашиглаад тануус ч гэсэн хүн амыг нэмэх асар их үйлсэд хувь нэмрээ сайн оруул гэе айн. ккк

Глобал СЕО гээд ЮБиЭс-р гараад байгаа нэвтрүүлгийг үзэж байгааздээ? Урьдны нэвтрүүлэгт нь манай блогчдын нэг, найз Сайнбаяр оролцож байсан юм. Сайнааг сайн ч дэмжсэн сэн.

Харин энэ удаагийнх дээр нь блогчин, танил, найз гээд нийт 3 хүн оролцож байдаг юм байна. Аль нэгийг нь овойж оцойтол дэмжиж сүйд болоогүй ч гэсэн нэг хүнийх нь талаар өөрийн сэтгэгдэл бодлоо үлдээмээр, амьтан хүмүүстэй хуваалцмаар санагдаад ер болж өгдөггүй.

Г.Нямдорж.
За миний хувьд амьдралдаа олон л чадалтай, мундаг аавийн хүүтэй уулзаж явлаа. Тэдний нэг бол яахийн аргагүй Нямдорж л доо. Түүнийг он удаан жилийн өмнөөс танихгүй ч нилээн хэдэн удаа уулзаж, шавь нь байж, мөн найз болсондоо би гэдэг хүн гөөмөн сэтгэл хангалуун байдгийн.

Хар багаасаа улсын чанартай математикийн уралдаан тэмцээнд оролцож, шагнал урамшууллыг нь түүчихдэг байсан энэ нөхөр Компьютер математик загварчлалын мэргэжилээр Монголд баклавр, дараа нь бизнесийн удирдлагаар Солонгосын Хангун Их Сургуульд магистр хамгаалаад ирсэн манай орны чадалтай залуучуудын нэг юм. Солонгост суралцах хугацаандаа тэр орны жижиг дунд үйлдвэрлэлийн талаар тусгайлан судалж, зөв гарц, сайн шийдлүүдийг нь Монголдоо нэвтрүүлэхийн тулд нилээн зүйл хийсэн гэдэг. Буцаж ирээд жижиг дунд үйлдвэрлэлийг дэмжих чиглэлээр насанд хүрэгчдэд сургалт явуулдаг сайхан ажил хийдэг болжээ.

Би түүний үйлдвэрлэлийг дэмжих сургалтанд нэг биш удаа хамрагдан 4 жил нухлуулаад толгойдоо хийж аваагүй зүйлсээ богинохон хугацаанд өөрийн болгож, цаашлаад зөв зохистой сайн бизнес хийх эхлэлээ тавьсан юм. Үнэндээ хэдэн мянган залуучуудыг ашигтай, томоохон хэмжээний бизнесмэн болж өөрийн компанийг зөв зохистой авч явах замыг нь бэлтгэн өгсөн гэж олон хүн үнэлдэг юм билээ. Насны хувьд маш залуухан ч гэсэн хийж буй үйлдэл, байгаа байдлаараа бусад хүмүүсийг урин дуудаж удирдан чиглүүлж чаддаг энэ хүнийг Глобал СЕО-д оролцож байгаад нь баярлаад зогсохгүй түрүүлж чадна гэдэгт нь итгэлтэй байгаан.

Манай блогчин нөхөд ч мөн адил юмны учир начир сайн олдог, зөвт сайн багш, сайн удирдагч болох Нямдоржыг дэмжээд өгвөл сайнсан..

Түүний хөтөлдөг блог сайт.

Улс орны бодлого дандаа л шагнал урамшууллын системээр явна гэж юу байхав. Угаасаа ч тийм сайхан юм байхгүй биз.
Хүний хөгжил, улс үндэстнийхээ хүн амын эрүүл мэндийг сахин хамгаалах, цаашдын үр удам нь эрүүл саруул өсөж бойжиход нь зориулж манай улс юу хийдэг юм бол?

Саяхан Азийн нэг орны үр удмаа аврах, эрүүл саруул нийгмийг бүтээх зорилготой үндэснийх нь хөтөлбөрын хүрээнд хуулиндаа оруулсан нэмэлтийн тухай сонсоод гөөмөн аятайхан юм гэж бодов.
Тэднүүр яажийн гэхээр: Тэтгэвэрт гарч байгаа гэр бүлийн 2 нь "гэрлэснээсээ хойш бие биедээ үнэнч явсан бол тэтгэвэрээс авах ёстой нийт мөнгөний 50 хувийг нь дахин нэмж шагнал маягаар олгоно" гэжээ.
Тэтгэвэр авч байгаа хүнийхээ хувьд бол гэр бүлийхээ хүнд үнэнч амьдарсныхаа төлөө 100 сая төг авах байсан бол 150 сая төгрөг авах боломжтой болж байна гэсэн үг байх нь.
Харин төр засгийн бодлого талаас нь авч үзвэл: Гэрлэснээсээ хойш нэг нэгэндээ үнэнч байснаараа хэн хэн нь гаднаас ямар нэгэн бэлгийн замын өвчин эмгэг авахгүй, өвчин аваагүй хүний чинь үр хүүхэд нь эрүүл, эрүүл хүнээс эрүүл хүүхэд төрнө гэх мэтийн зарчимаар явах юм. Гэхдээ "нэг нэгэндээ үнэнч явсан гэдгийг яаж нотлох вэ?" гэдгийг нь мэдэж чадсангүй. Та нарын бодлоор яаж мэдэж болхуу?

Эрүүл хүн олон болоод, эрүүл хүүхэд төрүүлээд байвал нийгэм тэр чигээрээ эрүүлжээд явчина биз тэ? Манайхан нэг хэрэгжүүлээд үзүүл яадийм бол, их л аятайхан санагдлаа.

Манай гэр хар хорин захын хажууханд байдаг учир золбин нохой ихтэй л дээ. Гэрээс гараад явж байхад зөндөө тааралддаг. Хоолны үлдэгдэл янз бүрийн юмаа авч гараад идүүлчихдэг ч удаа цөөнгүй.

Дулаарч эхэлснээс хойш гадаа үе үе "пад пад" хийх дуу гарах боллоо. Нэг хэсэг үүл буудаад байна уу гэсэн чинь үгүй бололтой. Үнэн хэрэгтээ бол гудамжны, эзэнгүй нохойг буудаж байгаан байна. Нохой хүний сайн анд нөхөр, дээрээс нь нохойнд учиргүй хайртай дуртай байдагийн хувьд нохой буудах нь буруу гэж үздэг ч өвчтэй, галзуу нохой ихссэнээс буудхаас өөр аргагүй гэдгийг нь хүлээн зөвшөөрөх болсын. үнэхээр л галзуурчихаад амьтан хүнрүү дайраад, урж тасдаад байдаг бол буудахаас өөр яах билээ...
Нохой бууддаг хүмүүс өөрсдийгөө АНЧИН гэж нэрлэдэг юм билээ. Анчид өглөөнөөс орой болтол энэ тэрүүгээр явж гудамжны, эзэнгүй, золбин нохой байна уу? гэж хайна. Олноороо цугласан, харагдсан тиймэрхүү нохойнуудаа буудаж унагаад, машиндаа ачаад, овоо хэд болохоор нь УЛААН ЧУЛУУТЫН ХОГИЙН ЦЭГ гэдэг газар аваачиж, хоншоорыг нь тайрч аваад, нүхэнд булаад ариутгалын бодис цацаад, нүхээ дүүрэн шороогоор бөглөөд явах ёстой. Ингэж хийснээрээ элдэв өвчин эмгэг үүсгэх вирус, янзүрийн юмыг нь устгаж, хүнд аюулгүй болгох зорилготой. Энэ бол тэдний хийх ажил.
Гэтэл гадуур буун дуу их гарах болсон. Буудахын тоолонгоор ноход үхэж байгаа биз. Нохой үхэхийн зэрэгцээ анчидын талаар ганц нэг шүүмжилмээр юм гарч ирээд байдаг.
1. Буудсан анчин нохойныхоо хоншоорыг тасдаж аваад биеийг нь ачилгүй, гадуур хаяаад явсан байхийн. Хоншоорыг нь тасдаж авдагийн учир нь буудсан нохойны тоог гаргах, нохой тус бүрээс 5000 төгрөг авдагтай холбоотой гэнээ. 5000 төгрөг авч л байвал нөгөө хүмүүсийг аюулгүй болгох, нохойг булах, ариутгах гэх мэт үүргийг умартжээ гэмээр. Үхсэн нохойн газрын хөршөнд хэр удаж байж шингэх вэ? Шингэхээсээ өмнө хүмүүст элдэв өвчин тарааж, гудамжинд хог болон үлдэнэ. Түүнийг яах вэ?
2. Төрснөөсөө хойш тоглож өссөн таван нохой байлаа гэхэд 4-ийг нь нүдэн дээр нь буудаад ачаад явах хирнээ нэгийг нь үлдээчихийн. Ганцаараа үлдсэн нохой найзыгаа алдсан хүн шиг гунигтай нь аргагүй гаслаж, байрнаасаа ер босохгүй юм. Алах л ёстой юм бол яагаад тавууланг нь агнасангүй вэ? Мөн зургаан гөлөгтэй эм нохой байхад гөлөгнүүдийг нь буудчихаад ээжийг нь үлдээчив. Эм л нохой юм хойно дахиад төрнө биздээ? Бас хүүхдээ алдсан эх хүний адил зовмоор л юм шиг.
3. Агнаад, алаад, ачаад явсан нохойгоо хогийн цэгтээ булах ёстой байтал тэр хавиар амьдардаг хүмүүст 200 төгрөгөөр зардаг сурагтай. Ариутгалын бодис цацаад булж аюулгүй, халдваргүйжүүлэх асуудал бас л орхигдлоо. 200 төгрөгөөр зардагийн учир нь ойр хавийн оршин суугчид нь өөрсдөө нохон мах иддэг, мөн өвчиж шулсан нохойн махаа 1кг-г нь 500- 800 төгрөгөөр захын гуанзанд зардагтай холбоотой.. Мах үнэтэй болсон цагт нөгөө хэд нь ч авдаг гэсэн. Цагдаа нар өглөөд иймэрхүү мах зардаг хүмүүсийг барьдаг ч маргааш нь дахиад л аваад ирнэ.
Иймэрхүү маягаар хийх ёстой юмаа ёсоор нь хийхгүй байх нь элбэг үзэгдэл болсоор. Үүн дээр хэн хяналт тавьж ажиллах вэ? Хэрвээ нохойг буудаад аюулгүй болгох эцсийн алхам хүртэл хийж чадахгүй юм бол агнаад, буудаад явах хэрэг байгаа ч юмуу үгүй ч юмуу. Харин ч илүү их эрсдэл дагуулах магадлалтай санагдана. Мэдээж бүх анчид нь ингэдэггүй л байх. Зарим сул, хойрго хандаад байгаа улсаас болж бид ямар байдалд орох аюултай вэ? Тарваган тахал гэдэг шиг нохойн вирус гээч юм гарахыг хэн байг гэхэв.....